Saitun

Tema  : Kesah Tuhan Erkuasalah Ibas Pemimpin

·         Meteh pemimpin si idemi Kuasa Dibata

·         Tetap mendukung pemimpin Negara ibas kerina daerah

Maju mundurna sada daerah ntah pe sada bangsa tergantung kubas uga pemimpinnna memimpin ntah pe merentah bangsa/ daerah e. Adi sikap ia mimpin, alu erkemalangen man Tuhan, bujur, adil ras ertanggung jawab pasti sikap bangsa e. Si e teridah tupung Josua mimpin bangsa Israel bengket ku taneh Kanaan si enggo ipadanken Tuhan man Abraham, Ishak ras Jakub. Sanga kepemiminen Josua, kegeluhen bangsa Israel sikap kerina, bangsa e nggeluh erkemalangen man Tuhan ras ndalanken si ngena ate Tuhan. Kenca Josua mate, bangsa Israel tetap dengan erkemalangen man Tuhan tupung pemimpin-pemimpinna si enggo ngidah perbahanen Tuhan si mbelin man bangsa Israel nggeluh denga (Hak 2:6-7).

Tapi kenca pemimpin-pemimpin enda enggo keri mate, bangsa Israel lanai nggeluh erkemalangen man Tuhan. Ilakokenna si la ngena ate Tuhan. Ilupakenna Tuhan, erdosa ia man Tuhan janah isembahna berhala Baal ras Asera (ay 7). Baal ras Asera ema dibata kalak Kanaan. Kalak Kanaan nembah ras mempercayaai Baal ras Asera sebagai dewa ras dewi kesuburen si banci mereken kemakmuren man nergerina. Janah bangsa Israel pe enggo terkontaminasi nandangi kegeluhen kalak Kanaan enda. Bangsa Israel pe enggo nembah man Baal ras Asera, isembah ras ipercayanina maka Baal ras Asera si mereken kesuburen ras kemakmuren man bana.

Erkiteken si e maka nembeh Tuhan man bangsa Israel, janah ipelepasNa raja Kusan Risataim I Mesopotami nari naluken ras merentah Israel waluh tahun dekahna (ay 8). Kenca bangsa enda seh I Kanaan, sope dengan ia bengket ku tanehna masing-masing , isuruh Josua gelah bangsa enda erpadan, lako ersembah man Dibata Jahwe si enggo maba ia ndarah I Mesir nari seh ku Kanaan, itantang Josua bangsa enda, janah Josua jine mereken usihen man bangsa enda, alu ngataken: “adi aku ras isi jabuku, Tuhan saja ngenca isembah kami”. Janah bangsa enda pe erpadan maka ia pe kerina ersembah man Dibata Jahwe ngenca (Jos 24:1-28). Tapi kedungenna padan si enggo ibahanna ndube ilanggarna, isembahna dibata-dibata sideban. Emaka reh rawa Tuhan man bangsa enda. Erkiteken Dibata eme Dibata si mecimberu, la kel ateNa lit Dibata si deban si man sembahen seakantan Ia ngenca. Emaka ipake Dibata me raja Kusan I Mesopotami nari guna ngkuasia Israel selama 8 tahun dekahna. Erti gelar Kusan Ristamim eme yang jahat lipat ganda. Arah sie si idah maka selama 8 tahun raja Kusan engkuasai Israel, melala kal kiniseran si man alanken bangsa Isreal.

Erkiteken sie erlebuh bangsa Israel man Tuhan (ay 9a), erkiteken kiniseran si man alankenna. Isadarina maka erkiteken dosa ras kelapatuhenna man Tuhan nge si erbanca reh kiniseran e man bana. Erkiteken enggo isembahna dibata-dibata si deban si erbanca turah perbeben ibas geluhna. Tapi Tuhan e Dibata si perukuah ras perkeleng. Kenca isadari bangsa enda kesalahenna ras dosana, erlebuh ia man Tuhan, mis ibegiken Tuhan ras ialoina bangsa enda alu mereken sekalak si mbebasken bangsa e, eme Otniel, anak Kenas agi Kaleb (ay 9b).

Kesah Tuhan reh man Otniel, janah ia jadi pemimpin bangsa Israel. Lawes ia erperang, janah ibereken Tuhan kemenangen ngelawan raja Mesopotami (ay 10). Kemenangen si ialoken Otniel labo perban gegehna, keberhasilenna sebagai pemimpin labo erkiteken kehebatenna tapi erkiteken Otniel ikuasai Kesah Tuhan. Ertina Kesah Tuhan si erdahin arah ia, si mereken kepentaren ras gegeh man bana, emaka ialokenna kemenangen lako ngelawan raja Mesopotami. La terjeng kemengangen si ialoken Otniel ras bangsa Israel, tapi selama kepemimpinen Otniel, bangsa Israel nggeluh ibas dame. Lanai lit si nerang ras si engkuasai bangsa Israel, pendahinna pe I pasu-pasu Dibata, lanai ia iukum Dibata. Otniel sebagai pemimpin Israel nggeluh erkemalangen man Tuhan ras ikuasai Kesah Tuhan, emaka bangsa Israel pe ibabaina nggeluh erkemalangen man Tuhan.

Arah nas renungenta enda si jadi perenungen man banta eme:

·         Kita sebage anak-anak Dibata si enggo ipilihNa jadi sikeranjangenNa tetap min patuh man baNa ras nggeluh ngikutken kerina perentahNa. Ola si bahan lit dibata-dibata sideban selain Dibata Jahwe si jadi Dibatanta gelah Dibata tetap masu-masu kegeluhenta ras la ngerehken rawa Tuhan ibas geluhta.

·         Kai si enggo si padanken man Dibata tetaplah si gelem ras si dalanken ibas geluhta selaku anak-anak Tuhan, gelah pasu-pasu Tuhan la erleka ibas kita nari

·         Ola si timai reh rawa Tuhan maka kita sadar kerna dosa si ilakoken kita. Adi lit si la payo ras si la ngena ate Dibata si lakoken mislah kita minta ampun man Tuhan. Tuhanta e  Dibata si melias dingen perkeleng. Adi reh kita man baNa ngakuken dosa-dosanta, ialemina kita (I Joh 1:9)

·         Sekalak pemimpin arus nggeluh erkemalangen man Tuhan ras ikuasai/ idemi Kesah Tuhan. Sebab Kesah Tuhan e nge si ngajari ia nggeluh setia man Tuhan, meteruk rukur ras ertanggung jawab. Adi sekalak pemimpin ikuasai Kesah Tuhan, ibas kepemimpinenna pasti ia mengutamaken sura-sura Tuhan, labo sura-surana. Si iukurkenna kerna kesejahteraan bangsana labo kesejahteranna.

·         Temanta: “Kesah Tuhan erkuasa ibas pemimpin”. Adi Kesah Tuhanlah si erdahin ibas pemimpin e, pasti maba dame sejahtera man rakyat/ anggota si ipimpinna. Emaka ibas masa-masa periodesasi kepengurusen mamre I belang-belang GBKP enda, marilah si totoken gelah kerina pemimpin/ pengurus mamrenta ikuasai Kesah Tuhan, gelah teridah kemajun mamre GBKP enda, ras mamre GBKP banci jadi pasu-pasu ibas geluhna, bagi motto mamre “Mediate ras erpemere”.

·         Selaku anak-anak Tuhan, kita pe tetap mendukung ras notoken pemimpin negaranta ibas kerina daerah, gelah ia pe tetap ikuasai Kesah Tuhan, alu bage pemimpinta pe tetap nggeluh erkemalangen man Tuhan ras ngasup maba bangsa enda bagi si ngena ate Tuhan. Arah pemimpin si ikuasai Kesah Tuhan, ngasup maba bangsanta enda nggeluh ibas dame ras terjadi keadilen ras kesejahteraan I tengeh-tengah bangsanta enda.