Tema  : 		Pehaga Tuhan Dibata AluKerja Rani 

I.              Kata Perlebe

Pehaga Tuhan alu kerja rani ngingetken man banta kerna uga hubungenta ras Dibata, uga Dibata nggo erdahin ibas kerina kegeluhenta, uga nggo Dibata mbereken pasu-pasu man banta. Alu bage ibas kerina si nggo berekan Dibata harus  simaknai maka kerina hasil si nggo ialoken kita rehna ibas pemasu-masun Dibata nari emaka ibas sienda arus sikataken bujur man Tuhan alu mereken ulih s lit ibas kita, alu meriah ukur ras dem pengatken bujur, alu bage gelah tetap malem dingen meriah ukurta ibas ngaloken keleng ate Tuhan ibas kegeluhenta.

Ibas oratenta sekali enda ngerana kerna kerja rani. Kerja rani ilakoken kenca rani gandum ntahpe 50 wari kenca paskah. Ntahpe irayaken kenca panen gandum. Janah tujun kerja rani eme mpehaga Tuhan,. Erkiteken si eme kerja rani enda harus ilakoken alu meriah i adep-adepen Tuhan ras kerina anggota jabu, carana eme maba persembahan ulih raninta rikutken pasu-pasu si nggo ialoken kita ibas Dibata nari.

Ibas ogenta wari enda lit piga-piga hal si banci sipelajari

1.    Pelaksanaan kerja rani eme pedah si isehken Musa man kalak Israel ras arus ilakoken bangsa e kenca bengket kubas teneh kanaan. Salah sada pedah si isehken Musa e me gelah kalak Isarel tetap nginget ras mepehaga Dibata, si nggo mulahi bangsa e ibas kerina kiniseranna I mesir nari

2.    Kerja rani eme perentah ntah aturen si arus ilakoken bangsa e ibas tep-tep Tahun dingen setiap kalak Israel si la ngelakokenca, ia ianggap kalak si la mematuhi aturen siberlaku nandangi kalak Israel.

3.    Kerja rani eme sebagai tanda pengataken bujur ras ncidahken kepatuhen ras penghormaten man Dibata, ras kune la ilakoken maka kalak Israel menolak ntah la mengakui maka Dibata me si enggo masu-masu bangsa e ibas kerina kegeluhena

4.    Kerja rani e pe imaknai sebagai tanda kiniersadan kerina kalak Israel, janah ibas kiniersadan e mereken keriahen man kalak si lalit peranina eme alu nehken kelang ate man kalak si musil, kalak lewi, kalak pertandang, anak yatim ras diberu balu-balu, arah merekan ulih si nggo ialoken ibas Dibata nari.

5.    Ibas nehken persembahan arus simehulina ibereken ibas pegaha Tuhan la banci mekarus tapi dem alu  pusuh si ermeriah ukur.

Pehaga Tuhan Dibata Alu Kerja Rani eme mereken simehulian ibas kita man Tuhan, tujuna eme, ngataken bujur man Tuhan erkiteken enggo ipasu-pasu Tuhan Kita ibas kerina pendahinta, janah pe mindo man Tuhan gelah ipasu-pasuNa tole nari ibas kerina usaha sinibahan kita gelah reh Buena ulih si banci I datken kita. Bali bagi bangsa Israel ibas ngerayaken kerja rani enda ia tetap nginget maka budak kap ia nai I Mesir, tapi erkiteken keleng ate Tuhan bangsa Isarel ngeluh bebas ras banci lit ingan pencarina, emaka la banci lang bangsa Israel harus patuh ras ersembah man Tuhan saja. Bagepe arah kerja rani enda memotivasi bangsa Israel gelah tetap ersembah man Tuhan saja. Bagepe kita harus sisadari maka kerina si lit ibas kita e bekas keleng ate Dibata. Persembahan kerja rani eme persembahan pengataken bujur ras mepehaga Tuhan erkiteken Tuhan si masu-masu pendahinta sedekah sada tahun. Amin gia persembahenta bentukan pengataken bujur, tapi sipatna eme ukur meriah. Emaka harus min sipersembahken simehulina ibas mepehaga Tuhan. Sebab persembahan simehuli ras erpalasken ukur meriah ialoken Tuhan kap. Bagepe tole ipasu-pasu Tuhan ka nge kerina pedahinta, emaka geluh kalak singgit nehken persembahan ngeluh ibas kejuah-juahen.